یوکرین کے دارالحکومت کیف پر روسی فضائی حملے میں ایک عورت ہلاک ہو گئی اور 25 منزلہ رہائشی عمارت کونقصان پہنچا ہے۔

کیف کے میئر وٹالی کلیچکو نے آج بروز پیر،  ٹیلی گرام سے جاری کردہ بیان میں کہا ہےکہ روس کی جانب سے رات کے وقت یوکرین کے دارالحکومت کیف پر کیے گئے فضائی حملے میں شہر کے بائیں کنارے پر واقع ایک میٹرو اسٹیشن کو نشانہ بنایا گیا ہے۔ حملے میں ایک عورت ہلاک ہو گئی  اور ایک 25 منزلہ  رہائشی عمارت کو نقصان پہنچا ہے۔

کلیچکو نے کہا ہےکہ حملے میں غیر رہائشی عمارتوں اور ایک طبی مرکز کو بھی نشانہ بنایا گیا جس کے نتیجے میں تین افراد زخمی ہوگئے ہیں۔

خبر رساں ادارے رائٹرز سے بات کرتے ہوئے ایک عینی شاہد نے بتایا ہے کہ شہر میں دھماکوں کی آوازیں سنی گئی ہیں۔

یوکرین کے صدر وولودیمیر زیلنسکی نے اعلان کیا ہے کہ امریکہ نے ایک مختصر وقفے کے بعد دوبارہ اہم انٹیلی جنس معلومات کا تبادلہ شروع کر دیا ہے، جن کی مدد سے روس کی جانب سے مرحلہ وار داغے جانے والے تیز رفتار میزائل حملوں سے متعلق پیشگی اطلاع حاصل کی جا سکتی ہے۔

زیلنسکی نے، رواں ماہ کے آغاز میں دورہ کیف کرنے والے امریکی امن نمائندوں، اسٹیو وٹکوف اور جیرڈ کشنر سے بھی ملاقات  کی ۔ یہ ملاقات ایسے وقت میں ہوئی ہے جب امریکی انتظامیہ جنگ کے خاتمے کے لیے کسی معاہدے تک پہنچنے کے لئے ثالثانہ کوششیں کر رہی ہے۔