اسرائیلی مبصر چینل 12 نے پیر کے روز رپورٹ کیا ہے کہ اسرائیل نے تل ابیب جانے والی ایتھوپین ایئر لائنز کی ایک پرواز کو واپس مڑنے کا حکم دیا کیونکہ اس کا ایک پائلٹ انڈونیشیائی تھا۔

رپورٹ کے مطابق، جب یہ حکم جاری کیا گیا تو طیارے کو ادیس ابابا سے پرواز کرتے  ہوئے تقریباً ایک گھنٹہ ہوا تھا اور وہ اب بھی ایتھوپیا کی فضائی حدود میں ہی تھا۔

چینل 12 کا کہنا ہے کہ اسرائیلی انٹیلی جنس نے ہوائی اڈے کے حکام کو پائلٹ کی قومیت کے بارے میں آگاہ کیا، جس کے بعد سیکیورٹی حکام اور وزارتِ مواصلات  نے پرواز کو لینڈنگ کی اجازت دینے سے روک دیا۔

طیارہ ادیس ابابا واپس لوٹ آیا، جہاں پائلٹ کو تبدیل کیا گیا، جس کے بعد طیارے نے دوبارہ اڑان بھری اور تل ابیب میں لینڈ کیا۔

رپورٹ کے مطابق، ایتھوپین ایئر لائنز نے اس واقعے کو ایک غلطی قرار دیتے ہوئے کہا کہ وہ اس بات سے لاعلم تھی کہ پائلٹ پر اسرائیل کے لیے پروازیں چلانے پر پابندی ہے۔

چینل 12 نے یہ بھی رپورٹ کیا کہ اسرائیلی حکام نے غیر ملکی ایئر لائنز کو ہدایت کی ہے کہ وہ اسرائیل جانے والی پروازوں پر ایسے ممالک کے عملے کے ارکان کو تعینات نہ کریں جن کے اسرائیل کے ساتھ سفارتی تعلقات نہیں ہیں۔

ان مبینہ پابندیوں کی زد میں افغانستان، الجزائر، انڈونیشیا، ایران، عراق، کویت، نائجر، قطر، سعودی عرب، صومالیہ اور وینزویلا کے شہری آتے ہیں۔

اس واقعے پر ایتھوپیا یا انڈونیشیا کے حکام کی طرف سے فوری طور پر کوئی تبصرہ سامنے نہیں آیا۔

یہ رپورٹ 30 ستمبر کو دبئی سے تل ابیب جانے والی فلائی دبئی کی پرواز کو مبینہ طور پر ہائی جیک کرنے کی کوشش کے بعد سامنے آئی ہے۔

متحدہ عرب امارات کے وکلاءِ استغاثہ نے بتایا تھا کہ ایک عمانی کو-پائلٹ نے طیارے کا کنٹرول سنبھالنے اور اسے بین گوریان ایئرپورٹ سے ٹکرانے کی کوشش کی تھی تاہم، مسافروں اور عملے نے اس کوشش کو ناکام بنا دیا اور طیارہ سعودی عرب کے شہر تبوک میں بحفاظت لینڈ کر گیا تھا۔