جمعہ کے روز جنگ بندی منصوبے کے اگلے مرحلے پر عمل درآمد کے حوالے سے اتفاق ہونے کا اعلان کئے جانے کے باوجود اسرائیل نے غزہ بھر میں فضائی حملے کر کے دو بچوں سمیت کم از کم آٹھ فلسطینیوں کو قتل اور متعدد کو زخمی کر دیا ہے۔
غزہ کے جنوبی شہر خان یونس میں واقع ناصر اسپتال کے ایک طبی ذریعے کے مطابق اسرائیل نے اتوار کی صبح شہر کے شمال مغربی علاقے القرارہ میں ایک رہائشی اپارٹمنٹ کو نشانہ بنایا۔
حملے میں ایک ہی خاندان کے میاں بیوی اور ان کی بیٹی پر مشتمل تین افراد جاں بحق اور تین دیگر زخمی ہوگئے ہیں۔
عینی شاہدین کی انادولو ایجنسی کو فراہم کردہ معلومات کے مطابق الہمس خاندان کے اپارٹمنٹ پر حملے کے نتیجے میں 38 سالہ محمود ذکی الہمس، ان کی 37 سالہ اہلیہ فاطمہ الہمس اور ان کی کم سن بیٹی شہید ہو گئے ہیں۔ لاشوں کو اسپتال منتقل کر دیا گیا ہے۔
مقامی ذرائع کے مطابق اسرائیلی توپ خانے نے خان یونس کے وسطی علاقے دارالسلام کو بھی نشانہ بنایا، تاہم ابتدائی اطلاعات کے مطابق اس حملے میں جانی یا مالی نقصان کی تفصیلات سامنے نہیں آئیں۔
اسرائیلی ہیلی کاپٹر نے غزہ کے وسطی حصّے دیر البلح کے مغرب میں واقع علاقے المشعل میں ایک گھر پر حملہ کر کے 68 سالہ کمال ابو معیلق اور ان کی 59 سالہ اہلیہ ہدیٰ کو قتل کر دیا ہے۔
غزہ میں اسرائیل کی نسل کُشی جنگ
غزہ شہر میں بندرگاہ کے قریب واقع السوسی ٹاور میں ایک اپارٹمنٹ پر اسرائیلی حملے میں تین فلسطینی شہید ہوگئے ہیں۔
شفا اسپتال کے ایک طبی ذریعے کے مطابق اس حملے میں 33 سالہ عبداللہ ابو طیف، ان کی 29 سالہ اہلیہ عبیر عنان اور ان کا پانچ سالہ بیٹا عزام ہلاک ہو گئے ہیں۔
اسرائیل نے غزہ شہر کے مغربی محلّے نصر میں فلسطین مسجد کے قریب واقع ایک اپارٹمنٹ پر ایک الگ حملے میں ایک فلسطینی کو زخمی کر دیا ہے۔
اسرائیلی فوجی گاڑیوں نے غزہ شہر کے مشرقی علاقے التفاح کے مشرقی حصوں پر بھی فائرنگ کی، تاہم اس واقعے میں کسی جانی نقصان یا زخمی ہونے کی اطلاع نہیں ملی۔
غزہ وزارتِ صحت کے مطابق اسرائیل نے 10 اکتوبر 2025 سے نافذ جنگ بندی معاہدے کی خلاف ورزیاں جاری رکھتے ہوئے کم از کم 1,222 افراد کو قتل اور 4,053 کو زخمی کر دیا ہے۔
وزارت نے مزید بتایا ہےکہ اسرائیل، اکتوبر 2023 سے غزہ پر مسّلط کردہ نسل کُشی جنگ میں کم از کم 73,349 فلسطینیوں کو قتل اور 174,162 کو زخمی کر چُکا ہے۔
اسرائیلی حملوں کے نتیجے میں غزہ کے شہری بنیادی ڈھانچے کا تقریباً 90 فیصد تباہ ہو چکا ہے۔ اقوام متحدہ کے اندازے کے مطابق غزہ کی تعمیرِ نو پر تقریباً 70 ارب امریکی ڈالر لاگت آئے گی۔
