روسی صدر ولادیمیر پوتن نے کہا ہے کہ ماسکو اور بیجنگ کے درمیان تعلقات "بے مثال سطح" پر پہنچ چکے ہیں۔

روسی سرکاری خبر رساں ایجنسی 'تاس' (TASS) کی جانب سے شائع کردہ بیانات کے مطابق، انہوں نے اپنے دورۂ چین سے قبل اس بات پر زور دیا کہ دونوں ممالک کی دوستی "کسی کے خلاف نہیں" ہے۔

بیجنگ کے سفر سے قبل منگل کو جاری ہونے والے ایک ویڈیو پیغام میں پوتن نے کہا کہ روس اور چین سیاست، معیشت، دفاع اور انسانی ہمدردی کے تبادلوں میں تعاون کو وسعت دینے کے لیے پرعزم ہیں۔

پوتن نے کہا کہ ہماری دوستی کسی کے خلاف نہیں ہے۔

 انہوں نے مزید کہا کہ دونوں ممالک کے مابین تعلقات "باہمی افہام و تفہیم اور اعتماد" اور ایک دوسرے کے بنیادی مفادات بشمول خودمختاری اور ریاستی اتحاد کی حمایت پر مبنی ہیں۔

پوتن نے بتایا کہ وہ چینی صدر شی جن پنگ کی دعوت پر بیجنگ کا سفر کر رہے ہیں، جنہیں انہوں نے ایک "دیرینہ اچھے دوست" کے طور پر بیان کیا۔ انہوں نے مزید کہا کہ دوطرفہ تعلقات کو گہرا کرنے کے لیے باقاعدہ اعلیٰ سطحی رابطے انتہائی اہم ہیں۔

ان کا کہنا تھا کہ 25 سال قبل اچھے ہمسائے اور دوستانہ تعاون کے معاہدے پر دستخط کرنے کے بعد سے دونوں ممالک نے ایک "حقیقی اسٹریٹجک تعلق اور جامع شراکت داری" قائم کی ہے۔

پوتن نے کہا: "(تعلقات کی) یہ خاص نوعیت باہمی افہام و تفہیم اور اعتماد کے ماحول، دونوں فریقوں کے فائدے (win-win) اور منصفانہ تعاون کو آگے بڑھانے کے عزم، احترام پر مبنی بات چیت، اور دونوں ممالک کے بنیادی مفادات کو متاثر کرنے والے معاملات بشمول خودمختاری اور ریاستی اتحاد کے تحفظ پر ایک دوسرے کی حمایت سے جھلکتی ہے۔"

پوتن نے اقتصادی تعاون کی بھی تعریف کی اور کہا کہ دوطرفہ تجارت 200 ارب ڈالر سے تجاوز کر چکی ہے اور اب لین دین "تقریباً مکمل طور پر روبل اور یوآن" میں کیا جا رہا ہے۔

انہوں نے باہمی ویزا فری نظام کی شروعات کا خیرمقدم کرتے ہوئے کہا کہ اس سے سیاحت، کاروباری سفر اور عوامی سطح پر روابط  کو فروغ ملے گا۔

پوتن نے مزید کہا کہ ماسکو چین کی تاریخ اور ثقافت کی بہت قدر کرتا ہے اور دونوں ممالک کے درمیان انسانی اور ثقافتی تعلقات کو مزید گہرا کرنا چاہتا ہے۔