ترکیہ کا نئی نسل کا بنیادی تربیتی طیارہ، حُرکش۔II، ترک فضائیہ کے بیڑے میں شامل ہونے والا ہے، جو ملک کی دفاعی صنعت کے لیے ایک نیا سنگِ میل ہے۔

ترکیہ کے محکمہ دفاعی صنعتوں کے سربراہ خالق گیورگُن اور ترک فضائیہ کے کمانڈر جنرل رافت دالکھران نے مقامی طور پر تیار کردہ حُرکش۔II اور حُرجیٹ طیاروں کی آزمائشی پروازوں میں حص لیا۔

گیورگن نے کہا کہ پہلا حُرکش۔II جلد ہی فضائی کمانڈ کے سپرد کر دیا جائے گا۔

انہوں نے ترک سوشل میڈیا پلیٹ فارم NSosyal پر لکھا"جب آپ طیارے کے کاک پِٹ میں بیٹھتے ہیں تو آپ ڈیزائن کی میز سے لے کر پیداوار کی لائن تک، اور آزمائشوں سے پرواز تک پھیلی ہوئی بے پناہ محنت کو زیادہ قریب سے محسوس کرتے ہیں۔"

"اب یہ محنت ایک اور نتیجہ دینے کے قریب ہے، ہم اپنا پہلا حُرکش۔II طیارہ بہت جلد اپنی فضائی کمانڈ کے حوالے کریں گے۔"

پرواز کے بعد شیئر کیے گئے ایک ویڈیو میں، گیورگُن نے اس متوقع فراہمی کو ترکیہ کے لیے ایک سنگِ میل قرار دیا۔

انہوں نے کہا "پہلی بار ترکیہ مقامی طور پر تیار کردہ طیارے کو اپنی مسلح افواج کو فراہم کر رہا ہے۔ یہ بہت زیادہ معنی خیز ہے۔"

"یہ آج اس کی آخری آزمائش بھی تھی۔ ان آخری ٹیسٹوں کا حصہ بننا ہمارے لیے باعثِ فخر تھا۔"

دالکھران نے بھی ترکیہ میں تیار طیارے میں پرواز کرنے کی اہمیت کو اجاگر کیا۔

اُنہوں نے کہا"ترک فضائیہ کے کمانڈر کے طور پر، اپنے ملک کے بنائے ہوئے طیارے میں پرواز کرنا میرے لیے ایک اعزاز اور فخریہ بات تھی۔"

پرواز کے بعد، گیورگُون نے دالکھران سے پوچھا کہ آیا طیارہ ٹیسٹ پاس کر چکا ہے اور اس کی منظوری کا عمل مکمل ہو گیا ہے۔جواباً کہا، جی ہاں، بہت عمدہ ہے۔

حُرجیٹ کی ملکی ریڈار صلاحیتیں

گیورگون اور دالکھران ایک حُرجیٹ ٹیسٹ پرواز میں بھی شریک ہوئے جس کے دوران اس طیارے نے ترکیہ کے مقامی ریڈار صلاحیتوں کا مظاہرہ کیا۔

پرواز کے دوران، حُرجیٹ P2 نے اسیل سان فرم میں تیار کردہ  MURAD فعال الیکٹرانک اسکینڈ اَرے (AESA) ریڈار کا استعمال کرتے ہوئے حُرجیٹ P1 کا پتہ لگایا اور اسے لاک کیا۔

گیورگن نے کہا کہ ترک فضائیہ کا عملہ ابتدائی تربیت حُرکش کے ذریعےحاصل کرے گا اور بعد ازاں حُرجیٹ پر پیشہ ور تربیت حاصل کرے گا۔

انہوں نے کہا کہ"ہمارے کمانڈر کی طرف سے اڑایا گیا حُرجیٹ، کہ جس پر اسیل سان کا تیار کردہ ریڈار نصب تھا نے ایک مخصوص فاصلے سے ہمارے سوار ہونے والے حُر جیٹ کو لاک کیا۔"

"ایسا پہلی بار ہوا ہے، یہ تجربہ کرنا، ایک تاریخی لمحے کا مشاہدہ کرنا اور اپنی پوری ٹیم اور قیمتی عملے کے ساتھ اس راہ پر چلنا بے حد معنی خیز ہے۔"