افغان حکام نے کہا ہے کہ پاکستان نے کابل اور متعدد سرحدی صوبوں میں نئے حملے کیے، جن کے نتیجے میں دارالحکومت میں چار افراد ہلاک ہوئے ہیں۔

کابل پولیس کے ترجمان خلیل زدران نے کہا کہ بمباری میں مکانات  کو نشانہ بنائے جانے سےچار افراد ہلاک اور 15 افراد زخمی ہوئے۔

ایک پاکستانی سیکیورٹی اہلکار نے، نام ظاہر نہ کرنے کی شرط پر، تصدیق کی کہ پاکستان نے رات بھر حملے کیے اور ان کا کہنا تھا کہ ہدف کالعدم  تحریکِ طالبان پاکستان کے عسکریت پسند تھے۔

اسلام آباد نے پچھلے ماہ اپنے پڑوسی کے خلاف ہوائی حملوں کی لہر شروع کی تھی اور کہا تھا کہ یہ کارروائی اندرونِ پاکستان میں حملوں میں اضافے کے بعد شدت پسندوں کو نشانہ بنانے کے لیے ہے۔

کابل میں طالبان حکومت نے ان حملوں میں ملوث ہونے کی تردید کی ہے۔

طالبان حکومت کے ترجمان ذبیح اللہ مجاہد نے ایکس پر کہا کہ پاکستانی حملوں نے جنوبی صوبہ قندھار کو بھی نشانہ بنایا۔

ان کا کہنا تھا کہ حملوں کا ہدف مشرقی صوبہ پکتیا بھی رہا، جو پاکستان کی سرحد سے  متصل  ہے۔

پاکستان کا موقف ہے کہ اس کے آپریشن دہشت گرد گروپوں کو نشانہ بنا رہے ہیں اور اس نے کہا ہے کہ عام شہری نہیں مارے گئے۔

حالیہ ہفتوں میں افغان اور پاکستانی فورسز سرحدی علاقوں میں بھی جھڑپوں میں ملوث رہی ہیں، جس سے تجارت متاثر ہوئی اور سرحد کے قریب رہنے والے لوگ اپنا گھر بارچھوڑنے پر مجبور ہوئے۔

اقوامِ متحدہ کے افغانستان مشن نے کہا ہے کہ 26 فروری  تا 5 مارچ پاکستانی فوجی کارروائیوں میں 56 عام شہری ہلاک ہوئے، جن میں 24 بچے شامل ہیں۔

اقوامِ متحدہ کے پناہ گزین ادارے نے کہا  ہے کہ تصادم کے باعث تقریباً 115,000 افراد بے گھر ہوئے ہیں۔