پیرو میں سیاحوں کو لے جانے والا  طیارہ، نازکا شہر کے جوار میں گر کر تباہ ہوگیا ہے۔  حادثے میں 13 افراد ہلاک ہوگئے ہیں۔

پولیس میجر جارجے آندرادے نے ہفتے کے روز ملک کے جنوبی حصے میں جائے حادثہ پر صحافیوں سے گفتگو کے دوران کہا ہے کہ "ہماری معلومات کے مطابق 11 مسافر اور عملے کے دو ارکان ہلاک ہو گئے ہیں۔"

نازکا بلدیہ نے فیس بک پر جاری کردہ بیان میں کہا ہے کہ یہ طیارہ سیاحوں کو نازکا لائنز کے فضائی نظارے کے لیے لے جا رہا تھا۔ یہ وسیع جغرافیائی نقوش صدیوں پہلے پیرو کے مقامی باشندوں نے نازکا کے اردگرد صحرا میں بنائے تھے۔

جانوروں کی شکلوں پر مشتمل یہ نقوش مکمل طور پر صرف ہوائی جہاز سے یا مخصوص مشاہداتی ٹاوروں سے ہی دیکھے جا سکتے ہیں۔

نازکا بلدیہ کے مطابق طیارہ قریبی شہر ایکا سے روانہ ہوا تھا اور اسے پیرو کی فضائی کمپنی ایروڈیانا چلا رہی تھی۔

کمپنی کی ویب سائٹ کے مطابق  وہ گزشتہ 14 برسوں سے سیسنا گرینڈ کیراوان طیاروں کے ذریعے نازکا لائنز کے اوپر سیاحتی پروازیں کروا رہی ہے۔

پیرو کے حکام نے حادثے کی تحقیقات شروع کرنے کا اعلان کیا  ہے لیکن ایروڈیانا نے اب تک اس واقعے پر کوئی بیان جاری نہیں کیا ہے۔