تہران نے ایران کے ایک تجارتی جہاز پر یوکرینی حملے میں ایک ملاح کی ہلاکت کی تصدیق کرتے ہوئے اعلان کیا ہے کہ وہ اپنے قومی مفادات کا دفاع کرے گا۔

ایران نے دعویٰ کیا ہے کہ یوکرین نے بحیرہ قزوین  میں ایک ایرانی تجارتی جہاز کو نشانہ بنایا، جس میں ایک ملاح ہلاک ہو گیا، اور ایران نے اس حملے کی مذمت کرتے ہوئے اسے "جارحیت کی کارروائی" قرار دیا ہے۔

ایرانی وزارتِ خارجہ کی جانب سے جاری کردہ بیان کے مطابق، یہ حملہ ہفتے کی صبح سویرے ہوا جس کے نتیجے میں جہاز میں دھماکہ ہوا۔ واقعے میں ایک ملاح ہلاک اور ایک زخمی ہوا۔

وزارت نے خبردار کیا ہے کہ ایران اپنے قومی مفادات کا ہر قیمت پر دفاع کرے گا۔

اس واقعے کو اقوامِ متحدہ کے چارٹر کے آرٹیکل 2 کی شق 4 کی خلاف ورزی قرار دیتے ہوئے وزارت نے کہا کہ یہ حملہ روس یوکرین جنگ کو مزید ہوا دے سکتا ہے اور اسے پھیلا سکتا ہے۔

وزارت کا دعویٰ ہے کہ یوکرینی انتظامیہ نے اس حملے کی ذمہ داری قبول کی ہے، جو تہران کے خلاف کیف کے "غیر منطقی اور معاندانہ رویے" کا عکاس ہے۔

اس بات کا اعادہ کرتے ہوئے کہ تہران روس یوکرین تنازع میں کبھی ملوث نہیں رہا، وزارتِ خارجہ نے اقوامِ متحدہ کی سلامتی کونسل، یورپی ممالک اور تمام یو این ارکان سے مطالبہ کیا ہے کہ وہ یوکرینی انتظامیہ کو اس کا ذمہ دار ٹھہرائیں۔

وزارت نے کیف پر بین الاقوامی قوانین کی خلاف ورزی کرنے، تنازع کو وسعت دینے اور عدم تحفظ پھیلانے کی کوشش کا الزام لگایا۔

ایرانی وزارتِ خارجہ نے واضح کیا کہ وہ بین الاقوامی قانون کے تحت حاصل حقِ خود ارادیت کے اصول کے مطابق ملک کے مفادات اور قومی سلامتی کے تحفظ سے پیچھے نہیں ہٹے گا۔

بیان میں کہا گیا ہے کہ یوکرینی انتظامیہ کی اس کارروائی، جسے انہوں نے "مہم جوئی" قرار دیا،  اس سے پیدا ہونے والے تمام نتائج کی ذمہ داری کیف اور اس کے حامیوں پر عائد ہوگی۔

دوسری جانب، یوکرین کے صدر وولودیمیر زیلینسکی نے ہفتے کے روز ایکس پر ایک بیان میں کہا کہ یوکرین نے بحیرہ قزوین میں طویل فاصلے تک مار کرنے والے حملوں میں "انتہائی طاقتور نتائج" حاصل کیے ہیں۔

زیلینسکی نے بتایا کہ ان حملوں میں ایران کی شمولیت کے ساتھ فوجی کارگو کی ترسیل کے لیے استعمال ہونے والے جہازوں اور ایک جنگی جہاز کو نشانہ بنایا گیا۔

تاہم زیلینسکی نے اس ایرانی تجارتی جہاز کا نام واضح طور پر نہیں لیا جس کا تہران نے ذکر کیا ہے۔"