کریملن کے ترجمان دیمتری پیسکوف نے بتایا ہے کہ روس نے مشرقی یوکرائنی شہر کوسیانتیو تیوکا پر قبضہ کر لیا ہے، جو کیف کے کنٹرول میں موجود دونباس کے آخری بڑے شہروں تک جانے والی  شاہراہ  پر واقع ایک اہم مقام ہے۔

پیسکوف نے جمعے کی دیر رات صحافیوں کو بتایا: " کوسیانتیو  تیوکا  پر مکمل طور پر  قبضہ کر لیا گیا ہے ۔ شہر اب پوری طرح ہمارے کنٹرول میں ہے۔" انہوں نے یہ بھی اعلان کیا کہ صدر ولادیمیر پوتن نے اس معاملے پر فوج سے بات کی ہے۔

ٹیلی ویژن پر اپنے جنرل اسٹاف کے سامنے یونیفارم میں نمودار ہوتے ہوئے، پوتن نے روسی فوجیوں کا شکریہ ادا کیا اور کہا کہ کوسیانتیو  تیوکا  کا حصول "سٹریٹیجک  اہمیت" کا حامل ہے۔

پوتن نے مزید کہا: "روسی مسلح افواج محاذ پر  سٹریٹیجک برتری کو  مضبوطی سے برقرار رکھے ہوئے ہیں۔"

ایک روسی کمانڈر، آنتون گرونس نے کہا کہ فوج "باقی بچنے والے  فوجیوں کی تلاش اور خاتمے کے آپریشنز" کر رہی ہے جو عمارتوں، تہہ خانوں اور ملبے میں چھپنے کی کوشش کر رہے ہیں۔

پورا لوہانسک روسی کنٹرول میں

اس شہر کی لڑائی، جس کی آبادی جنگ سے پہلے تقریباً 78,000 تھی، سنہ 2025 کے اواخر سے جاری تھی اور اب یہ ایک ایسے محاذ پر روس کی مرکزی کوشش بن گئی ہے جو ایک ہزار کلومیٹر سے بھی زیادہ طویل ہے۔

کوسیانتیو  تیوکا   کراماتورسک اور سلوویانسک کے کلیدی شہروں تک جانے والے راستے پر موجود آخری یوکرینی مضبوط گڑھوں میں سے ایک ہے، جن پر قبضہ کریملن کا حتمی ہدف ہے۔

پیسکوف نے کہا کہ پوتن ایک روسی فوجی کمانڈ پوسٹ پر گئے، جہاں انہوں نے اپنے جنرل اسٹاف کی رپورٹ سنی اور روسی فوجیوں کا شکریہ ادا کیا۔

پیسکوف نے مزید کہا کہ روسی افواج اب مشرقی یوکرین میں دونباس کے دو صوبوں میں سے ایک لوہانسک علاقے کے پورے حصے پر قابض ہیں۔

دریں اثنا چیف آف جنرل اسٹاف والیَری گیراسِموف نے کہا کہ روسی افواج اب زاپوریژیا سے نو کلومیٹر کے فاصلے پر ہیں، جو جنوبی یوکرین کا ایک بڑا شہر ہے اور جنگ سے پہلے اس کی آبادی 700,000 سے زیادہ تھی۔