بھارت کے الیکشن کمیشن کی جانب سے جاری کردہ نتائج کے مطابق، وزیر اعظم نریندر مودی کی بھارتیہ جنتا پارٹی (بی جے پی) نے چار میں سے دو ریاستی انتخابات جیت لیے ہیں، جبکہ مشرقی ریاست مغربی بنگال میں بھی اپنی حکمرانی کو وسعت دی ہے۔

ان علاقائی انتخابات کو پانچ خطوں میں وزیر اعظم کی پارٹی کے لیے عوامی حمایت کا ایک اہم امتحان قرار دیا جا رہا تھا، جہاں اپریل کے اوائل سے مختلف مراحل میں پولنگ ہوئی تھی۔

الیکشن کمیشن آف انڈیا کے اعلان کردہ نتائج کے مطابق، مودی کی جماعت شمال مشرقی ریاست آسام میں دوبارہ اقتدار حاصل کرنے میں کامیاب رہی ہے، جہاں اس نے 126 میں سے 82 نشستیں حاصل کیں۔

 دوسری جانب اپوزیشن جماعت کانگریس صرف 19 نشستیں جیت سکی۔

ایک بڑی تبدیلی کے طور پر، بی جے پی نے مشرقی ریاست مغربی بنگال میں 200 سے زائد نشستیں جیت کر میدان مار لیا اور وزیر اعلیٰ ممتا بنرجی کو اقتدار سے باہر کر دیا، جو مسلسل چوتھی بار کامیابی کی امید لگائے بیٹھی تھیں۔

موجودہ حکمراں جماعت 'آل انڈیا ٹرنمول کانگریس' صرف 74 نشستیں حاصل کر سکی۔

نتائج پر ردعمل دیتے ہوئے وزیر اعظم مودی نے ان نتائج کو "تاریخی" قرار دیا۔

مودی نے سوشل میڈیا پلیٹ فارم 'X' پر لکھا کہ : "نسلوں سے لاتعداد کارکنوں کی انتھک محنت اور جدوجہد کے بغیر مغربی بنگال میں بی جے پی کی یہ تاریخی جیت ممکن نہیں تھی۔"

دیگر ریاستوں کے نتائج کے مطابق، ریاست کیرالہ میں انڈین نیشنل کانگریس نے 63 نشستیں حاصل کر کے انتخاب جیت لیا، جبکہ پڈوچیری میں مودی کے قومی جمہوری اتحاد (NDA) 'آل انڈیا این آر کانگریس' نے 30 میں سے 12 نشستیں حاصل کیں۔

تامل ناڈو میں، جہاں بی جے پی اپنا اثر و رسوخ بڑھانے کی کوشش کر رہی تھی، علاقائی جماعت 'تاملگا ویٹری کزگم' نے کل 234 میں سے 100 سے زائد نشستیں جیت لیں۔ 2026 تک کے اعداد و شمار کے مطابق، بی جے پی اب دو درجن سے زائد ریاستوں اور وفاقی علاقوں میں برسرِ اقتدار ہے۔