یوکرین کے ایک ڈرون حملے نے راتوں رات روس کے علاقے یاروسلاو میں ایک آئل ریفائنری اور روسٹوف آن ڈان  میں ایک ٹرانسفارمر سب اسٹیشن کو نقصان پہنچایا ہے، جبکہ یوکرینی حکام نے کیف اور اوڈیسا میں روسی حملوں سے جانی نقصان اور تباہی کی اطلاع دی ہے۔ 

یاروسلاول کے علاقائی گورنر میخائل ایورایف  نے روسی سوشل میڈیا پلیٹ فارم 'میکس'  پر بتایا کہ فضائی دفاعی نظام نے علاقے میں 65 ڈرونز کو مار گرایا۔ 

ایورایف نے کہا کہ اس حملے سے یاروسلاول میں ایک آئل ریفائنری کو نقصان پہنچا، جہاں آگ بھڑک اٹھی، جبکہ ڈرونز کا ملبہ گرنے سے کئی اپارٹمنٹ عمارتوں اور گاڑیوں کے شیشے ٹوٹ گئے، انہوں نے مزید کہا کہ کوئی جانی نقصان نہیں ہوا ہے۔ 

دوسری طرف، روسٹوف کے علاقائی گورنر یوری سلوصار  نے بتایا کہ ڈرونز کے ملبے نے روسٹوف آن ڈان میں ایک ٹرانسفارمر سب اسٹیشن کو نقصان پہنچایا، جس سے شہر کے چار اضلاع میں بجلی کی سپلائی معطل ہو گئی۔ 

انہوں نے کہا کہ چھ نجی مکانات اور بیرونی عمارتوں کو بھی نقصان پہنچا ہے، جبکہ کسی جانی نقصان کی اطلاع نہیں ملی۔ 

دریں اثنا، ماسکو کے میئر سرگئی سوبیانین  نے مزید تفصیلات فراہم کیے بغیر کہا کہ دارالحکومت کی طرف بڑھنے والے چھ ڈرونز کو مار گرایا گیا ہے۔ 

یوکرین میں ایک درجن سے زائد افراد زخمی 

یوکرین میں، کیف کے میئر وٹالی کلیٹسکو  نے کہا کہ راتوں رات ہونے والے روسی حملوں نے دارالحکومت کے کئی اضلاع میں رہائشی اور دیگر عمارتوں کو نقصان پہنچایا ہے۔ 

کلیٹسکو نے واضح کیا کہ ان حملوں میں 16 افراد زخمی ہوئے، جن میں سے نو کو ہسپتال منتقل کر دیا گیا ہے۔ 

اوڈیسا میں، یوکرینی حکام نے ایک 19 منزلہ اپارٹمنٹ بلڈنگ کو نقصان پہنچنے کی اطلاع دی، جس میں 14 ویں سے 16 ویں منزل تک کے اپارٹمنٹس تباہ ہوئے، جبکہ مقامی حکام نے جانی نقصان کی بھی اطلاع دی ہے۔ 

راتوں رات رپورٹ ہونے والے یہ واقعات دونوں طرف سے بنیادی ڈھانچےاور دیگر اہداف پر روس اور یوکرین کے مسلسل ڈرون حملوں کے دوران سامنے آئے ہیں۔"