پاکستان اور ناروے کے وزرائے خارجہ نے آج پاکستان کے دارالحکومت اسلام آباد میں ہونے والی ملاقات میں دوطرفہ تعلقات کے ساتھ ساتھ بین الاقوامی اور علاقائی صورتحال پر تفصیلی تبادلہ خیال کیا۔

پاکستان کی وزارتِ خارجہ کے بیان میں بتایا گیا ہے کہ ناروے کے وزیر خارجہ  ایسپن بارتھ  آئیڈے اپنے پاکستانی ہم منصب اسحاق ڈار سے ملاقات کے لیے اسلام آباد پہنچے۔

یہ دورہ گزشتہ ایک دہائی میں پاکستان اور ناروے کے مابین اعلیٰ ترین سطح کا دورہ ہے۔

بیان میں کہا گیا ہے کہ  دونوں وزراء نے دوطرفہ تعلقات کا تفصیلی جائزہ لینے کے علاوہ علاقائی اور بین الاقوامی امور پر گفتگو کی اور باہمی دلچسپی کے شعبوں میں تعاون کو مضبوط بنانے کے عزم کا اعادہ کیا۔"

اسحاق ڈار نے اپنے افتتاحی خطاب میں کہا کہ ان کا ملک مختلف شعبوں میں ناروے کے ساتھ دوطرفہ تعلقات اور تعاون کو مزید وسعت دینا چاہتا ہے۔

 انہوں نے اس بات پر بھی روشنی ڈالی کہ ناروے کی ترقی میں 60,000 افراد پر مشتمل پاکستانی  برادری  اہم کردار ادا کر رہی ہے۔

جواب میں، ناروے کے وزیر خارجہ  نے امریکہ اور ایران کے درمیان کشیدگی کو ختم کرنے کے لیے اسلام آباد کے ثالثی کے کردار کی تعریف کی۔

 انہوں نے مشرقِ وسطیٰ کی موجودہ صورتحال کو عالمی امن اور معیشت کے لیے نقصان دہ قرار دیتے ہوئے پاکستان کی قیادت میں کی جانے والی ثالثی کی کوششوں کا حوالہ دیا اور کہا کہ یہ دنیا کے لیے ایک حقیقی خدمت ہے۔