سمندری راستوں کی دریافت: ترکیہ کے ساحل پر ملنے والا دنیا کا قدیم ترین بحری جہاز

ہزاروں سال پہلے بحیرہ روم میں تجارتی سامان لے جانے والا ایک بحری جہاز اپنی منزل پر پہنچنے سے پہلے ہی غرق ہو گیا تھا۔ اس کا سامان سمندر کی تہہ میں محفوظ رہا، جس نے قدیم دور کی عظیم سمندری طاقتوں کے عروج سے بہت پہلے کی تجارتی دنیا کے شواہد کو اپنے اندر سموئے رکھا۔ اب، ترکیہ کے بحیرہ روم کے ساحل پر اس ملبے کی تحقیقات کرنے والے ماہرینِ آثارِ قدیمہ کا ماننا ہے کہ یہ دنیا کا قدیم ترین معلوم بحری جہاز کا ملبہ ہو سکتا ہے، جو تقریباً 4,700 سال پرانا ہے۔

 یہ دریافت بین الاقوامی سمندری تجارت کے آغاز کی ایک نایاب جھلک پیش کر سکتی ہے۔

اس دریافت کے پیچھے بحیرہ روم کی آثارِ قدیمہ ایسوسی ایشن کی مہم کی قیادت کرنے والے،میڈیٹیر نئین یونیورسٹی  کے پروفیسر  خاقان اونیج  ہیں۔ اونیج کہتے ہیں، "یہ ایک انتہائی اہم دریافت ہے کیونکہ یہ ہمیں لیونٹ (شام، لبنان، فلسطین کا خطہ) اور بحیرہ روم کے دیگر حصوں کے درمیان سمندری تجارت کا براہ راست ثبوت فراہم کرتی ہے۔"

انطالیہ میں کیکووا جزیرے  کے قریب ملنے والے اس ملبے نے قدیم تہذیبوں اور ان کے باہمی روابط کا مطالعہ کرنے والے مؤرخین میں جوش و خروش پیدا کر دیا ہے۔ یہ دریافت ان تجارتی تعلقات اور سامان کی نقل و حرکت کے بارے میں سراغ فراہم کر سکتی ہے جنہوں نے اس دور کی ساحلی بستیوں کو آپس میں جوڑا تھا جب مصر میں "عظیم اہرام"  تعمیر کیا جا رہا تھا۔ یہ کوئی اتفاق نہیں ہے کہ اونیج اس دریافت کے سربراہ ہیں۔ تقدیر کے دھارے نے انہیں بچپن میں ہی اس راستے پر ڈال دیا تھا۔

ایک تاحیات جنون

پروفیسر اونیج کے لیے یہ دریافت پانی کے نیچے چھپی تاریخ میں زندگی بھر کی دلچسپی کا نچوڑ ہے۔ انہوں نے بتایا، "انڈر واٹر آرکیالوجی (پانی کے نیچے آثارِ قدیمہ) کے ساتھ میری کہانی اس وقت شروع ہوئی جب میں صرف پانچ یا چھ سال کا تھا۔ میرے والد نے مجھے ایک بڑا ڈائیونگ ماسک خرید کر دیا تھا جس سے میرا پورا چہرہ ڈھک جاتا تھا۔"

ایسکی شہر  میں پیدا ہونے والے اونیج بتاتے ہیں کہ انہوں نے ہمیشہ اپنی چھٹیاں سمندر کے کنارے گزاریں۔ بچپن میں بھی وہ پانی کے نیچے ملنے والی اشیاء سے مسحور ہو جایا کرتے تھے۔ وہ کہتے ہیں، "جب مجھے پانی کے نیچے رنگ برنگے پتھر اور مٹی کے برتنوں کے ٹکڑے ملتے، اور یہ احساس ہوتا کہ یہ پرانے وقتوں کے لوگوں کی چھوڑی ہوئی چیزیں ہیں، تو مجھے بے پناہ خوشی ہوتی۔ میں تب ہی سے سمندری آثارِ قدیمہ اور سمندر کے نیچے موجود تاریخی اشیاء میں دلچسپی لے رہا ہوں۔"

اسی ابتدائی شوق نے آگے چل کر ان کے تعلیمی کیریئر کو تشکیل دیا۔ انہوں نے آثارِ قدیمہ کی تعلیم حاصل کی اور قونیہ کی سلجوک  یونیورسٹی  سے ماسٹرز اور پی ایچ ڈی کی ڈگریاں مکمل کیں۔ تاہم، قونیہ سمندر سے دور ہے، جو پانی کے نیچے کی جانے والی تحقیق کے لیے موزوں نہیں تھا۔

اونیج نے کہا، "انڈر واٹر آرکیالوجی کو سمندر کے قریب کسی یونیورسٹی میں منتقل کرنے کی ضرورت تھی۔ یونیسکو (UNESCO) کے ترک قومی کمیشن کے اس وقت کے صدر منیر کارالوغلو کی مدد سے، ہمیں قونیہ میں تیار کردہ انفراسٹرکچر کو انطالیہ منتقل کرنے کا موقع ملا۔"

اس اقدام سے اکڈینیز یونیورسٹی میں انڈر واٹر آرکیالوجی کی سرگرمیوں کو قائم کرنے میں مدد ملی۔ یونیورسٹی کا "بحیرہ روم کے انڈر واٹر کلچرل ہیریٹیج ریسرچ" کا شعبہ اب اس فیلڈ میں خصوصی تعلیم فراہم کرتا ہے۔ اونیج کے مطابق، یہ ترکیہ میں اپنی نوعیت کا واحد شعبہ ہے جس میں تقریباً 50 طلباء زیرِ تعلیم ہیں۔ وہ کہتے ہیں، "یہ وہ جگہ ہے جہاں ترکیہ کے انڈر واٹر آرکیالوجسٹ تیار کیے جا رہے ہیں۔"

اس شعبے کا کام صرف تعلیم تک محدود نہیں ہے۔ یونیورسٹی کے اندر ایک لیبارٹری موجود ہے جہاں سمندر سے نکالی گئی اشیاء کو محفوظ اور بحال  کیا جاتا ہے، تاکہ آنے والی نسلیں ان کا مطالعہ کر سکیں۔ اسی طرح کی حفاظتی کوششوں نے محققین کو کیکووا جزیرے کے قریب ملنے والے جہاز کے ملبے کی عمر کا اندازہ لگانے میں مدد فراہم کی ہے۔

دو بحری جہازوں کی کہانی

شروع میں اس دریافت کی اہمیت کو فوری طور پر تسلیم نہیں کیا گیا تھا۔ جب ٹیم کو تقریباً چار سال پہلے پہلی بار یہ ملبہ ملا، تو سمندر کی تہہ میں بکھرے ہوئے مٹی کے برتن کسی بہت بعد کے دور کے معلوم ہوتے تھے۔

اونیج بتاتے ہیں، "ہم نے ابتدا میں سوچا کہ یہ شاید عثمانیہ دور کا کوئی حالیہ بحری جہاز ہو سکتا ہے۔ مٹی کے برتن یا 'امفورے'- دو ہینڈل والے مٹی کے مٹکے) ان جانی پہچانی نوکیلی یا گول اقسام سے مشابہت نہیں رکھتے تھے جو ہمیں دوسرے ملبوں سے ملتی ہیں۔ ان کے پیندے چپٹے تھے، اور اس طرح کے برتن عام طور پر عثمانی دور، خاص طور پر آخری عثمانی دور سے منسوب کیے جاتے ہیں۔"

ٹیم نے اس جگہ کی دستاویزی ریکارڈنگ تو کی لیکن کارگو کی اصل عمر کا فوری تعین نہ کر سکی۔ اصل کامیابی بعد میں ملی جب محققین ایک اور بحری جہاز کے ملبے کا مطالعہ کرتے ہوئے مصر کے آثارِ قدیمہ کے ذرائع کا جائزہ لے رہے تھے۔

اونیج کہتے ہیں، "پچھلے سال، جب ہم ایک اور بحری جہاز کے سلسلے میں مصری ذرائع دیکھ رہے تھے، تو ہمیں ایسے امفورے ملے جو کیکووا میں ملنے والے برتنوں سے بہت مشابہ تھے۔" مصر میں ملنے والا جہاز بھی اسی دور کا ہے، لیکن ترکیہ میں ملنے والا ملبہ اس سے بھی کہیں زیادہ پرانا مانا جاتا ہے۔

محققین نے ترکیہ کی وزارتِ ثقافت اور سیاحت سے اس جگہ کا دوبارہ دورہ کرنے کی اجازت لی۔ ان کے دوبارہ معائنہ سے معلوم ہوا کہ یہ برتن "برانز ایج" (عہدِ برنجیں / کانسی کے دور) کے اوائل کے دوران لیونٹ (Levant) خطے سے تعلق رکھنے والے امفوروں جیسے تھے۔ انہوں نے کہا، "جب ہم ملبے پر واپس گئے، تو ہم نے دیکھا کہ یہ واقعی لیونٹ میں پائی جانے والی قسم کے امفورے تھے۔ یہ چپٹے پیندے والے برتن تھے جن کے اطراف میں ہینڈل تھے، جو لیونٹ کے امفوروں کی خاص خصوصیت ہے۔"

ٹیم نے ان برتنوں کی عمر اور ممکنہ ماخذ کا اندازہ لگانے کے لیے اسی طرح کے دیگر برتنوں کی بناوٹ، ان کی سجاوٹ اور مٹی کی ساخت کا موازنہ کیا۔ اونیج نے بتایا، "امفوروں کی بناوٹ اور ان پر موجود نقش و نگار کی بنیاد پر، ہم نے اس ملبے کا زمانہ 2700 سے 2400 قبل مسیح کے درمیان کا تعین کیا ہے۔" انہوں نے مزید کہا کہ ٹیم کے موجودہ جائزے کے مطابق، اب تک کا کوئی دوسرا معلوم بحری جہاز اس دور کا نہیں ملا ہے۔ "یقیناً، چند سالوں میں، یا شاید 20 یا 30 سالوں میں اس سے بھی پرانا ملبہ دریافت ہو سکتا ہے۔ یہ ہمیشہ ممکن ہے۔ لیکن موجودہ حالات میں، یہ وہ سب کچھ ہے جو ہم جانتے ہیں۔"

لیونٹ کے ایک تاجر کا کارگو

اگرچہ بحری جہاز بذاتِ خود اپنی اصل شکل میں محفوظ نہیں رہا، لیکن وہاں سے ملنے والی اشیاء صرف جہاز کی عمر بتانے سے کہیں زیادہ معلومات فراہم کرتی ہیں۔ ان اشیاء کا ایک دوسرے سے مختلف ہونا یہ بھی ظاہر کر سکتا ہے کہ جہاز کے سفر شروع کرنے سے پہلے یہ کارگو کیسے اکٹھا کیا گیا تھا۔

اگرچہ برآمد ہونے والے مٹکوں کی عام شکل ایک جیسی ہے، لیکن وہ بالکل یکساں نہیں ہیں۔ ان کے نقش و نگار اور مٹی کی ساخت مختلف ہے، جس سے اندازہ ہوتا ہے کہ یہ کسی ایک کارخانے کے بجائے مختلف بستیوں میں تیار کیے گئے ہوں گے۔

اونیج وضاحت کرتے ہیں، "امفورے بالکل ایک جیسے نہیں ہیں۔ ان کی عمومی شکل ملتی جلتی ہے، لیکن ان کی سجاوٹ، ڈیزائن اور مٹی مختلف ہے۔" ماہرِ آثارِ قدیمہ کے لیے یہ تنوع اس تاجر کی سرگرمیوں کی ایک جھلک پیش کرتا ہے جو اس کارگو کا مالک تھا۔ اونیج کہتے ہیں، "یہ ممکن ہے کہ کسی چھوٹے پیمانے کے تاجر نے لیونٹ کی مختلف بستیوں کے درمیان سفر کیا ہو، ایک جگہ سے تین اور دوسری جگہ سے چار امفورے اکٹھے کیے ہوں، اور پھر انہیں جہاز پر لوڈ کیا ہو۔"

یہ برتن موجودہ دور کے جنوبی شام، لبنان اور فلسطین کے ساحلوں کے ساتھ واقع بندرگاہوں سے آئے ہو سکتے ہیں، جبکہ کچھ شاید وادیٔ اردن  میں تیار کیے گئے ہوں۔ ان میں زیتون کا تیل یا شراب ہو سکتی ہے، جبکہ رال  ہونے کا امکان کم سمجھا جاتا ہے۔

یہ جہاز بظاہر مغرب کی طرف سفر کر رہا تھا جب یہ ڈوب گیا۔ اس کی حتمی منزل کا یقین سے نہیں کہا جا سکتا، لیکن اونیج کا خیال ہے کہ یہ ٹرائے (Troy) یا کریٹ (Crete) کی طرف جا رہا ہو گا، جو مینوان (Minoan) تہذیب کا مسکن تھا۔ یہ دریافت اس لیے اہم ہے کیونکہ لیونٹ، کریٹ اور ٹرائے کے درمیان تجارت کا علم اس خطے کے آثارِ قدیمہ سے ملنے والی اشیاء سے پہلے ہی سے تھا۔ لیکن جو بات واضح نہیں تھی، وہ یہ تھی کہ یہ سامان کس طرح سفر کرتا تھا۔

اونیج نے کہا، "اب تک، ہم ان خطوں کے درمیان تجارت کے بارے میں اس لیے جانتے تھے کیونکہ ہمیں ایک علاقے کی اشیاء دوسرے علاقے سے ملی تھیں۔ لیکن یہ ملبہ ہمیں براہ راست ثبوت دیتا ہے کہ سامان سمندری راستے سے منتقل کیا جا رہا تھا۔"

گمشدہ سمندری راستہ

اس دریافت سے پیدا ہونے والا ایک سوال سمندری نقل و حمل اور زمینی تجارتی راستوں کے درمیان تعلق سے متعلق ہے۔ کچھ نظریات یہ بتاتے ہیں کہ لیونٹ اور ٹرائے کے درمیان منتقل ہونے والا سامان راستوں کے ایک ایسے نیٹ ورک کے ذریعے سفر کرتا تھا جسے عام طور پر "  راہ کاروان  کہا جاتا ہے۔

اونیج نے کہا کہ ایسے راستے واقعی موجود ہو سکتے تھے، اور اس ملبے کو اس بات کا ثبوت نہیں سمجھا جانا چاہیے کہ وہ راستے موجود ہی نہیں تھے۔ وہ کہتے ہیں، "شاید واقعی ایسا کوئی راستہ تھا۔ ہمارے ساتھی اس کے وجود پر یقین رکھتے ہیں، اور اس کی تائید میں شواہد بھی موجود ہیں۔ وہ ایک الگ سوال ہے۔"

تاہم، یہ بحری جہاز کا ملبہ یہ ثابت کرتا ہے کہ کچھ مخصوص قسم کے کارگو کو منتقل کرنے کے لیے سمندر کیوں ایک زیادہ کارآمد اور آسان متبادل پیش کر سکتا تھا۔ اونیج کہتے ہیں، "اگر آپ کے پاس لے جانے کے لیے 30 یا 40 امفورے ہوں، تو انہیں زمینی راستے سے لے جانے کے بجائے بحری جہاز سے بھیجنا بہت زیادہ آسان ہے۔"

کیکووا کے ملبے سے اب تک مٹی اور سیرامک کی تقریباً 30 اشیاء کی شناخت کی جا چکی ہے۔ مزید کام اس کارگو اور اس سفر کے پیمانے کے بارے میں اضافی معلومات فراہم کر سکتا ہے۔ اونیج کے لیے، اصل اہمیت صرف زمین پر ملنے والی اشیاء کی بنیاد پر لگائے جانے والے مفروضوں سے آگے بڑھنے کا موقع ملنے میں ہے۔ انہوں نے کہا، "ہم پہلے ہی جانتے تھے کہ لیونٹ اور ٹرائے و کریٹ جیسی جگہوں کے درمیان تجارتی تعلقات تھے۔ یہ بحری جہاز ہمیں جو دکھاتا ہے وہ یہ ہے کہ اس تجارت کا کم از کم کچھ حصہ سمندر کے راستے ہوتا تھا۔"