نیٹو-یوکرین کونسل کا ایک ہنگامی اجلاس برسلز میں مستقل نمائندوں کی سطح پر منعقد ہوا، تاکہ یوکرین دفاعی رابطہ گروپ کے اجلاس سے قبل یوکرین روس سے لاحق خطرات اور اپنی فوری دفاعی ضروریات کے بارے میں اتحادیوں کو آگاہ کر سکے۔

یوکرین کے نیٹو مشن کے سوشل میڈیا پلیٹ فارم 'X' پر جاری کردہ بیان کے مطابق، نیٹو ہیڈ کوارٹر میں ہونے والے اس اجلاس کی صدارت سیکرٹری جنرل مارک روٹے نے کی۔

یوکرین کے یورپی انٹیگریشن کے ذمہ دار نائب وزیر دفاع سرگی بوئیف  نے اجلاس میں ذاتی طور پر شرکت کی، جبکہ یوکرین کی مسلح افواج کے قائم مقام ڈپٹی کمانڈر ان چیف بریگیڈیئر جنرل سرہی سوبکو  ویڈیو کانفرنس کے ذریعے شریک ہوئے۔

دونوں شخصیات نے روس سے لاحق خطرات کی نوعیت اور وسعت کے بارے میں اتحادیوں کو تازہ ترین معلومات فراہم کیں، اور یوکرین کی فوری دفاعی ضروریات کے ساتھ ساتھ اگلے سال کی ترجیحات سے بھی آگاہ کیا۔

یوکرین دفاعی رابطہ گروپ کا اجلاس 17 نومبر کو برطانیہ اور جرمنی کی قیادت میں برسلز میں نیٹو ہیڈ کوارٹر میں ہوگا۔

'رامسٹین گروپ' کے نام سے بھی جانے جانے والا یوکرین دفاعی رابطہ گروپ اپریل 2022 میں امریکہ کی پہل پر قائم کیا گیا تھا، جو یوکرین کے لیے فوجی امداد کو مربوط کرنے کے لیے 50 سے زائد ممالک کو ایک پلیٹ فارم پر لاتا ہے۔

دوسری جانب، جولائی 2023 میں ولنیئس سربراہی اجلاس  کے دوران قائم ہونے والی نیٹو-یوکرین کونسل ایک ایسا ادارہ ہے جہاں نیٹو کے رکن ممالک اور یوکرین برابر کے شرکاء کے طور پر سیکیورٹی کے معاملات پر تبادلہ خیال کرتے ہیں اور مشترکہ فیصلے لیتے ہیں۔