چینی خبر رساں ایجنسی 'شین ہوا'  کی رپورٹ کے مطابق، ایک مشترکہ بیان میں چین اور اردن نے کہا ہے کہ امریکہ اور ایران کے درمیان جنگ بندی کو برقرار رکھا جائے اور آبنائے ہرمز سے معمول کی آمد و رفت کو دوبارہ بحال کیا جائے۔

چین اور اردن نے کہا کہ مذاکرات اور مشاورت کے ذریعے ایک ایسے "جامع حل" کی تلاش ہونی چاہیے جو علاقائی تناؤ کی بنیادی وجوہات کو ختم کر سکے۔

دونوں ممالک نے "مقبوضہ مغربی کنارے اور مشرقی القدس میں اسرائیل کے خطرناک اور کشیدگی بڑھانے والے اقدامات پر گہری تشویش" کا اظہار بھی کیا۔

چینی صدر شی جن پنگ نے پیر کے روز بیجنگ میں اردن کے شاہ عبداللہ  دوم سے ملاقات کی۔

اردن کی شاہی عدالت کے 'ایکس'  اکاؤنٹ پر کیے گئے اعلان کے مطابق، چینی وزیر اعظم لی چیانگ نے بھی بیجنگ میں شاہ عبداللہ دوم سے ملاقات کی اور اہم اقتصادی شعبوں میں دوطرفہ تعلقات کو مضبوط بنانے کے طریقوں پر تبادلہ خیال کیا۔

اس ملاقات کے دوران، اردن کے  فرماں روا  نے ایک اہم اقتصادی شراکت دار کے طور پر چین کے کردار پر زور دیا، اس بات کی تصدیق کی کہ اردن کے پاس دوطرفہ تعاون کے لیے بہت کچھ پیش کرنے کو ہے اور باہمی تجارت و سرمایہ کاری کو وسعت دینے کے لیے بڑے مواقع موجود ہیں۔

شاہ عبداللہ دوم کا یہ سرکاری دورہ جو چین کا ان کا مجموعی طور پر نواں اور 2015 کے بعد پہلا دورہ تھا، پیر کے روز چینی رہنماؤں کے ساتھ اعلیٰ سطحی رابطوں کے بعد اختتام پذیر ہو گیا۔

چین، اردن کا سب سے بڑا تجارتی شراکت دار ہے اور دونوں ممالک کے درمیان دوطرفہ تجارت کا حجم تقریباً 6.7 ارب ڈالر تک پہنچ چکا ہے۔

اس کے علاوہ، چینی وزیر خارجہ وانگ ای نے اردن کے وزیر خارجہ ایمن صفدی سے ملاقات کی جو شاہ عبداللہ کے ہمراہ اس دورے پر موجود تھے۔

چینی وزارت خارجہ کے بیان کے مطابق، دونوں فریقین نے اگلے سال سفارتی تعلقات کی 50 ویں سالگرہ سے قبل اسٹریٹجک تعلقات کو مزید گہرا کرنے کے عزم کا اعادہ کیا۔

صفدی نے 'ون چائنہ' اصول کے لیے اردن کی غیر متزلزل وابستگی کو دہرایا اور خطے میں بیجنگ کے تعمیری سفارتی کردار کی تعریف کی۔

علاقائی پیش رفت کا ذکر کرتے ہوئے وانگ ای نے اس بات پر زور دیا کہ مسئلہ فلسطین مشرق وسطیٰ کے استحکام کے لیے مرکزی اہمیت کا حامل ہے اور اسے پسِ پشت نہیں ڈالا جانا چاہیے۔

انہوں نے غزہ میں مستقل جنگ بندی کے لیے جاری مذاکرات کی ضرورت پر زور دیا؛ دوسری طرف صفدی نے دو ریاستی حل کی اہمیت پر روشنی ڈالی اور امن کے لیے چین کی کوششوں کا خیرمقدم کیا۔