قومی ادارہ برائے آفات و انتظام  کا کہنا ہے کہ کولمبیا میں زلزلے کے باعث ہلاکتوں کی تعداد 321 تک پہنچ گئی،  جبکہ بوگوتا نے انسانی امداد بھیجنے پر انقرہ کا شکریہ ادا کیا۔

UNGRDنے جمعہ کو X پر ایک پوسٹ میں کہا کہ 257 افراد لاپتہ ہیں، جبکہ 284,185 افراد، جو 146,188 خاندانوں کی نمائندگی کرتے ہیں، اس آفت سے متاثر ہوئے ہیں۔

آفت کے انتظامی ادارے کے مطابق تازہ ترین اعداد و شمار کولمبیا کے 15 صوبوں اور 476 بلدیات کا احاطہ کرتے ہیں۔

اب تک تقریباً 31,445 گھر تباہ  جبکہ 163,884 نقصان زدہ ہو چکے ہیں۔ مجموعی طور پر 467 عمارتیں بھی گر چکی ہیں، جو زیادہ تر کالی اور پیریرا میں واقع ہیں، یہ دونوں مغربی کولمبیا کے سب سے زیادہ متاثرہ شہر ہیں۔

زلزلے سے 351 صحت کی تنصیبات، 3,579 اسکول، 4,611 کمیونٹی سینٹر، 435 سڑکیں اور 180 گاڑیاں  اور پیدل چلنے والے پل بھی متاثر ہوئے۔

دوسری جانب کولمبیا نے زلزلہ متاثرین کے لیے انسانی امداد بھیجنے پر ترکیی کا شکریہ ادا کیا۔

کولمبیا کی وزارت خارجہ نے X پر پوسٹ میں کہا: 'ہم نے ترکیہ کی طرف سے زلزلے سے متاثرہ افراد  کے لیے بھیجی گئی انسانی امداد وصول کر لی ہے۔'

وزارت نے بتایا کہ اس کھیپ میں ایک میٹرک ٹن سے زائد خوراک، 900 سے زائد کمبل اور 450 کلو گرام ادویات شامل تھیں۔

وزارت نے کہا'ہم  حکومت ِ ترکیہ اور عوام کے تعاون اور کولمبیا کے لیے ان کے عزم کے شکرگزار ہیں،'

'ہمارے بین الاقوامی  دوستوں  کی جانب سے تعاون ہمارے ملک میں پہنچتا رہتا ہے،'

10 اگست کو آنے والا 7.4 شدت کا زلزلہ اس صدی کا کولمبیا میں آنے والا سب سے طاقتور زمینزلزلہ تھا۔

اس کا مرکز سان جوس دل پامار کے نزدیک پیسفک صوبہ چوکو میں تھا اور یہ تقریباً 110 کلومیٹر کی درمیانی گہرائی پر واقع تھا۔ گہرائی کے باوجود، ساختی نقصان ملک کے مغربی خطے اور بڑے شہری مراکز تک تیزی سے پھیل گیا۔