گزشتہ ہفتے چین اور نیپال کی سرحد کے قریب آنے والی اچانک سیلابی لہروں اور زمینی سرکنے کے باعث ہلاکتوں کی تعداد بدھ کو جاری کیے گئے سرکاری اعداد و شمار کے مطابق بڑھ کر 1,130 ہو گئی ہے، جبکہ تقریباً 4,500 افراد تا حال لاپتہ ہیں۔

نیپال کی قومی اتھارٹی برائے آفات  کا کہنا ہے کہ 26 اگست کو ملک میں شدید سیلاب کے بعد اب تک 1,114 لاشیں برآمد ہو چکی ہیں۔ جبکہ  292 افراد زخمی ہوئے ہیں اور 3,916 لاپتہ ہیں۔

حکام کا  کہنا تھا کہ سیلاب زدہ علاقوں سے تقریباً 12,000 افراد کو بچایا گیا ہے، جبکہ تلاش و ریسکیو آپریشنز میں مدد کے لیے فوج اور پولیس سمیت 21,000 سے زیادہ سیکیورٹی اہلکار تعینات کیے گئے ہیں۔

حکام کے مطابق نیپال میں سیلاب سے تقریباً 16 لاکھ  افراد متاثر ہوئے ہیں۔

شن ہوا نیوز ایجنسی نے رپورٹ کیا ہے کہ  اسی آفت میں چین میں  کم از کم 16 افراد ہلاک ہوئے ہیں جبکہ 546 لاپتہ ہیں۔

ریاستی خبر رساں ایجنسی کے مطابق چین میں لاپتہ افراد میں 261 غیر ملکی شہری بھی شامل ہیں۔