جنوبی افریقہ کے بین الاقوامی تعلقات و تعاون امور کے وزیر رونالڈ لمولا نے کہا کہ ترکیہ کی جانب سے عالمی عدالت انصاف میں اسرائیل کے خلاف دائر نسل کشی کے مقدمے کی حمایت “بہت واضح” ہے۔

لمولا نے کرُگر نیشنل پارک میں منعقدہ جنوبی افریقہ ترقیاتی برادری (SADC) کے خارجہ امور کے وزراؤں کی نشست میں، اے اے کے رپورٹر کو، اسرائیل کے خلاف دائر نسل کشی کے مقدمے کے امکانات اور پیش رفت کے بارے میں اپنے جائزے پیش کیے۔

انہوں نے بتایا کہ جنوبی افریقہ اس ڈھانچے کی صدارت کر رہا ہے جسے 'ہیگ گروپ' کہا جاتا ہے اور جس کا مقصد بین الاقوامی قانون کے زوال کو روکنا ہے، اور کہا کہ "ترکیہ سمیت متعدد ممالک اس مقدمے میں جنوبی افریقہ کے ساتھ شامل ہیں۔"

لمولا نے کہا کہ مقدمے کے معاملے میں وہ ترکیہ کے ساتھ مربوط انداز میں عمل کر رہے ہیں اور کہا، "ہم ترکیہ کے ساتھ قریبی طور پر کام کر رہے ہیں۔ ترکیہ نے مقدمے میں اپنی حمایت کا بڑے  واضح انداز میں اظہار کیا  ہے۔"

جنوبی افریقہ کا بین الاقوامی عدالت انصاف میں اسرائیل کے خلاف دائر کیا گیا نسل کشی کا مقدمہ

جنوبی افریقہ جمہوریہ نے 29 دسمبر 2023 کو 1948 کے اقوامِ متحدہ کے 'نسل کشی کی روک تھام اور سزا' کنونشن کی خلاف ورزی کے الزام کے تحت اسرائیل کے خلاف عالمی عدالت انصاف میں مقدمہ دائر کیا تھا۔

عدالت نے 26 جنوری، 28 مارچ اور 24 مئی 2024 کو تین علیحدہ عبوری اقدامات کے فیصلے جاری کیے تھے۔

ان فیصلوں میں کہا گیا تھا کہ اسرائیل کو نسل کشی کنونشن کی دفعہ 2 میں متعین اعمال کے ارتکاب کو روکنے کے لیے تمام ضروری اقدامات اٹھانے چاہئیں، اسرائیلی فوج کو ایسے اقدام فوراً نافذ کرنے چاہئیں جو نسل کشی کے جرائم کو روکیں، خصوصاً رفح میں ایسے فوجی آپریشنز ختم کیے جائیں جو نسل کشی کے خطرے کو پیدا کر سکتے ہوں، اور کیے گئے اقدامات کی باقاعدگی سے عدالت کو اطلاع دی جائے۔

اسرائیل نے دو بار وقت میں توسیع کی درخواست کرنے کے بعد 12 مارچ کو اپنا جواب نامہ عدالت میں جمع کروایا تھا۔

ترکیہ، اسپین، نیدرلینڈز، آئرلینڈ، کولمبیا، میکسیکو، چلی، بولیویا، کیوبا، بیلیز، برازیل، کوموروس اور نمیبیا سمیت متعدد ممالک اس مقدمے میں مداخلت کرنے والی فریقین میں شامل ہیں۔