آسٹریلیا نے پیر کے روز اعلان کیا ہے کہ اس نے اپنی تاریخ کا سب سے بڑا دفاعی برآمدی معاہدہ کیا ہے، جس کے تحت کینیڈا 2.5 بلین آسٹریلوی ڈالر کے معاہدے میں نگرانی کی ریڈار ٹیکنالوجی خریدے گا۔

دفاعی وزیر رچرڈ مارلس نے کینیڈا کے وزیر مملکت برائے دفاعی خریداری اسٹیفن فوہر کے ساتھ مل کر اس معاہدے کا اعلان کیا۔

آسٹریلیا کے وزیر اعظم انتھونی البانیز کے دفتر سے جاری کردہ ایک بیان کے مطابق، یہ آسٹریلیا کی جانب سے افق سے پار ریڈار ٹیکنالوجی کی بیرون ملک پہلی فروخت ہے اور یہ قطب شمالی کے خطے کی نگرانی میں کینیڈا کی مدد کرے گی۔

اوور دی ہورائزن ریڈار ٹیکنالوجی ہائی فریکوئنسی والی برقی مقناطیسی لہروں کو زمین کی فضا سے ٹکرا کر واپس موڑتی ہے تاکہ ان دور دراز کی چیزوں کا پتہ لگایا جا سکے جو زمین کی گولائی کی وجہ سے نظر نہیں آ سکتیں۔

البانیز نے ایک بیان میں کہا کہ 'آج کا معاہدہ آسٹریلیا کی دفاعی تجارت میں ایک اہم سنگ میل ہے اور کینیڈا کے ساتھ دفاعی صنعت کے گہرے اور باہمی طور پر فائدہ مند تعاون کی بنیاد رکھتا ہے۔'

آسٹریلیا کا جندالی آپریشنل ریڈار نیٹ ورک' 3,000 کلومیٹر دور تک کے طیاروں، بحری جہازوں اور میزائلوں کا پتہ لگا سکتا ہے اور ان کا پیچھا کر سکتا ہے۔

فوہر نے کہا کہ یہ ٹیکنالوجی کینیڈا کو اپنے 'آرکٹک خطے کی آگاہی' کو مزید بڑھانے کی اجازت دے گی۔

فوہر نے مزید کہا کہ یہ صلاحیت بہت زیادہ فاصلے اور مضبوطی کے ساتھ  فضائی اور بحری خطرات کا پتہ لگائے گی اور ان کا پیچھا کرے گی، جس سے وقت سے پہلے وارننگ ملے گی، براعظمی دفاع میں بہتری آئے گی اور آرکٹک پر کینیڈا کی خودمختاری مضبوط ہوگی۔

انہوں نے کہا کہ آسٹریلیا اور کینیڈا ہمیشہ سے بہترین دوست رہے ہیں لیکن حقیقت میں، جو کچھ ہم نے آج  طے کیا ہے اس سے اب اس تعلقات کو ایک بہت اہم تزویراتی جہت مل گئی ہے۔