فلسطین وزارتِ صحت نے کہا ہے کہ اسرائیلی فوج نے مقبوضہ مغربی کنارے کے شمالی علاقے میں ایک بچے سمیت تین فلسطینیوں کو قتل کر دیا اور ان کی لاشیں بھی ورثا کے حوالے نہیں کیں۔
وزارت ِ صحت نے جمعرات کو جاری بیان میں کہا ہےکہ اسرائیل اور فلسطینی اتھارٹی کے درمیان سرکاری رابطہ ادارے سول افیئرز جنرل اتھارٹی نے اطلاع دی ہے کہ اسرائیلی فوج نے فائرنگ کر کے نابلس کے مشرق میں واقع قصبہ بیت فوریک میں 20 سالہ محمود حسین ابو سمرہ اور 16 سالہ محمد سامر ملیطات کو قتل کر دیا ہے۔
بیان میں مزید کہا گیا ہےکہ جنین کے مشرق میں حداد جنکشن کے قریب اسرائیلی فوج نے ایک اور 24 سالہ فلسطینی کو گولی مار کرقتل کر دیا ہے۔
فلسطین کے سرکاری خبر رساں ادارے وفا 'WAFA' نے سکیورٹی ذرائع کے حوالے سےشائع کردہ خبر میں کہا ہے کہ اسرائیلی فوج نے جمعرات کو علی الصبح بیت فوریک میں دو فلسطینیوں کو گولی مار کر قتل کیا اور ان کی لاشیں بھی واپس نہیں کیں۔
اسرائیلی فائرنگ میں زخمی ہونے والے دو دیگر فلسطینیوں کو علاج کے لیے اسپتال منتقل کر دیا گیا ہے۔
بیت فوریک کے میئر یوسف حنانی نے کہا ہےکہ اسرائیلی فوج نے قصبے کے تمام داخلی راستے بند کر دیئے اور فوجیوں اور غیر قانونی اسرائیلی آبادکاروں نے ان مقامی باشندوں پر حملہ کیا جو اپنی زرعی زمینوں میں لگنے والی آگ بجھانے کی کوشش کر رہے تھے۔
حنانی کے مطابق، اسرائیلی فوجیوں نے ایک گھر کے مالک کو تشدد کا نشانہ بنانے کے بعد ایک فلسطینی خاندان کو زبردستی اپنا گھر خالی کرنے پر مجبور کیا۔ انہوں نے بتایا ہے کہ آگ بجلی کے کھمبوں تک پھیل گئی اور اسرائیلی آبادکاروں نے قصبے میں فلسطینیوں کی زیرِ ملکیت کی دو گاڑیوں کو بھی آگ لگا دی۔
انہوں نے مزید کہا ہے کہ اسرائیلی فوج کے بیت فوریک کی فوجی چوکی کو بند کرنے کے بعد درجنوں افراد نہ تو اپنے گھروں تک پہنچ سکے اور نہ ہی قصبے سے باہر جا سکے۔
یہ قتل و غارت گری اسرائیلی فوج کی طرف سے،مقبوضہ مغربی کنارے کے شمال میں واقع غیر قانونی بستی ' گانیم' کے قریب ایک فلسطینی کے چاقو سے حملہ کرنے کی کوشش کرنے اور فوج کے اُسے گولی مارنے کا، دعوی کرنے کے بعد کی گئی ہے۔
فلسطینی سرکاری اعداد و شمار کے مطابق 8 اکتوبر 2023 کو غزہ میں اسرائیلی فوجی کاروائی شروع ہونے کے بعد سے اسرائیلی فوج اور غیر قانونی آبادکاروں نے مقبوضہ مغربی کنارے میں فلسطینیوں اور ان کی املاک پر حملے تیز کر دیئے ہیں۔ ان حملوں میں اب تک کم از کم 1,185 فلسطینی جاں بحق اور 3,816 زخمی ہو چکے ہیں۔
