ترکیہ قومی انٹیلی جنس تنظیم (MİT) کے سربراہ ابراہیم قالن نے ایتھنز میں یونان کی قومی انٹیلی جنس سروس (EYP) کے سربراہ تھیِمسٹوکلیس دیمیریس سے ملاقات کی ہے۔

ترکیہ سکیورٹی ذرائع سے موصول  معلومات کے مطابق گزشتہ ہفتے  طے پانے والی ملاقات کے دوران دوطرفہ تعلقات اور علاقائی صورتحال پر تبادلۂ خیال کیا گیا اور مسائل کے حل کے لیے اٹھائے جانے والے ممکنہ اقدامات کا  جائزہ لیا گیا ہے۔

ملاقات میں اس بات پر زور دیا گیا ہے کہ بحیرۂ ایجیئن اور مشرقی بحیرۂ روم، نیٹو کی سلامتی، انٹیلی جنس تعاون، دہشت گردی، منظم جرائم، غیر قانونی نقل مکانی اور انسانی اسمگلنگ کے خلاف جدوجہد کے شعبوں میں دونوں ممالک کے تعلقات  انتہائی اہمیت رکھتے ہیں۔

اس موقع پر امریکہ۔ ایران جنگ، شام میں نئے دور کے آغاز، لیبیا کی سیاسی وحدت، فلسطین کے مسئلہ، غزہ اور مغربی کنارے میں اسرائیل کی طرف سےجاری خلاف ورزیوں اور قبضہ پالیسیوں  نیز شام اور لبنان کے خلاف اسرائیلی حملوں پر بھی تبادلۂ خیال کیا گیا ہے۔

دونوں ممالک کے درمیان دہشت گردی اور منظم جرائم پیشہ گروہوں کے خلاف جدوجہد کے حوالے سے حالیہ عرصے میں حاصل ہونے والی پیش رفت کو مزید تیز کرنے اور اسے تزویراتی سطح تک لے جانے کی ضرورت پر اتفاق کیا گیا ہے۔

ترکیہ خفیہ ایجنسی کے سربراہ ابراہیم قالن اور یونان خفیہ ایجنسی  کے سربراہ دیمیریس نے دوطرفہ اور علاقائی معاملات میں دونوں انٹیلی جنس اداروں کے درمیان قریبی تعاون کو مزید مضبوط بنانے پر بھی اتفاق کیا ہے۔